ON mánáidkonvenšuvdna lea fátmmastuvvon norgga láhkii, ja dat cealká čielgasit ahte mánáin leat iehčanas vuoigatvuođat, ja dasa gullá maid dat ahte lea vuoigatvuohta iežas astoáigái. Mánáin galgá leat vejolašvuohta leat mielde doaimmain ja valáštallamiin iežaset dáhtuid ja dárbbuid vuođul. Dat addá maiddá sidjiide dovddu leat oassin searvevuođas gos fidne ođđa ustibiid ja ovdánahttá kultuvrralaš gullevašvuođa ja identitehta searvama bokte.
ON mánáidkonvenšuvdna fátmmastuvvui norgga láhkii 2003:s, ja gohčoduvvo maiddá mánáid iežaset vuođđoláhkan. Konvenšuvdna lea áibbas čielggas dan dáfus ahte mánáin leat iehčanas vuoigatvuođat. Dat guoská diehttalasat maiddá vuoigatvuhtii astoáigái, artihkal 31 lágas lea dan birra. Norgga mánáidvaláštallanmodealla dohkkeha máná iešheanalaš indiviidan ja ahte sidjiide danne addo vejolašvuohta leat mielde valáštallamiin iežaset sávaldagaid ja dárbbuid vuođul.
Aktiivvalaš astoáigi mas lea ulbmil ovdánahttá olbmo. Mánáide ja nuoraide lea astoáiggebáiki dávjá báiki gos earret eará háhká ustibiid, šaddá oassin searvevuođas ja ovdánahttá kultuvrralaš gullevašvuođa ja identitehta searvama bokte. Buot mánáin berre leat vejolašvuohta searvat dákkár arenaide.
Mánáidkonvenšuvdna galgá fuolahit ahte mánáin, beroškeahttá geat sii leat dahje gos sii bohtet, lea dat man sii dárbbašit vai sis lea buorre dilli. Juohkehaččas lea vuoigatvuohta stoahkat, vuoiŋŋastit ja astoáigái. Dát vuoigatvuohta galgá sis leat beroškeahttá sin váhnemiin dahje váldeguddiid duogážis, ovttaseallinvuogis dahje ámmáteallimis. Min oktasaš servodatovddasvástádus lea sihkkarastit ahte buot mánáide addo vejolašvuohta searvat doaimmaide valáštallamis, musihkas, dánsumis, teáhteris dahje eará astoáiggedoaimmaide maidda mánát háliidit searvat.
Ii leat vejolaš loguiguin ja sániiguin dadjat man ollu dat mearkkaša, ja man dehálaš lea ahte mánáin lea buorre bajásšaddandilli, ja dalle lea astoáiggedoaimmain hui guovddáš rolla. Danne fertet mii láhčit dan ovdii vai buot mánáin leat seamma vejolašvuođat.
